ភ្នំពេញ ៖ រាជរដ្ឋាភិបាលកម្ពុជាបានប្រកាសទទួលស្គាល់វិទ្យាស្ថានពាណិជ្ជសាស្ត្រអេស៊ីលីដា ទៅជាសាកលវិទ្យាល័យពាណិជ្ជសាស្ត្រអេស៊ីលីដាជាផ្លូវការ ដោយផ្ដោតលើជំនាញដែលរួមមានហិរញ្ញវត្ថុ ធនាគារនិងជំនាញបច្ចេកទេសឌីជីដល ដើម្បីចូលរួមជាមួយរដ្ឋាភិបាលក្នុងចក្ខុវិស័យជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០និងប្រទេសមានប្រាក់ចំណូលខ្ពស់នៅឆ្នាំ២០៥០ ។
សាកលវិទ្យាល័យពាណិជ្ជសាស្ត្រ អេស៊ីលីដា ជាក្រុមហ៊ុនបុត្រសម្ព័ន្ធរបស់ធនាគារ អេស៊ីលីដា ភីអិលស៊ី និងជាថ្នាលអប់រំធុរកិច្ចប្រកបដោយគុណភាពឈានមុខ ដើម្បីរួមចំណែកក្នុងការអភិវឌ្ឍសេដ្ឋកិច្ចកម្ពុជា និងថ្នាក់តំបន់។
យោងអនុក្រឹត្យលេខ ២៧ អនក្រ.បក ចេញដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ស្តីពីការទទួលស្គាល់ការប្រែក្លាយ វិទ្យាស្ថានពាណិជ្ជសាស្ត្រ អេស៊ីលីដា ទៅជា សាកលវិទ្យាល័យពាណិជ្ជសាស្ត្រ អេស៊ីលីដា ដោយធ្វើការបណ្ដុះបណ្ដាលកម្រិត បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ ។
សម្រាប់ការសិក្សាបរិញ្ញាបត្ររង មានជំនាញ ហិរញ្ញវត្ថុ និងធនាគារ ជំនាញគណនេយ្យ ជំនាញធានារ៉ាប់រង ជំនាញចលនូបត្ថម្ភជំនាញគ្រប់គ្រងអាហរ័ណ-នីហរ័ណ ជំនាញទីផ្សារ ជំនាញភាសាអង់គ្លេស។
ចំណែកថ្នាក់បរិញ្ញាបត្ររួមមាន ជំនាញហិរញ្ញវត្ថុ និងធនាគារ ,គណនេយ្យ,គ្រប់គ្រងហានិភ័យ និងធានារ៉ាប់រង,សេដ្ឋកិច្ចពាណិជ្ជកម្ម,នីតិសាស្ត្រ,គ្រប់គ្រងបណ្តាញផ្គត់ផ្គង់ និងចលនូបត្ថម្ភ ,ពាណិជ្ជកម្មអន្តរជាតិ ទីផ្សារ,គ្រប់គ្រងធុរកិច្ច និងសហគ្រាស,បច្ចេកវិទ្យាព័ត៌មានធុរកិច្ច វិទ្យាសាស្ត្រ និងវិស្វកម្មកុំព្យូទ័រ ,បច្ចេកវិទ្យាហិរញ្ញវត្ថុ,ភាសាអង់គ្លេសសម្រាប់ទំនាក់ទំនងធុរកិច្ច ការបង្រៀនភាសាអង់គ្លេស,ជំនាញភាសាអង់គ្លេសសម្រាប់បំណិនបកប្រែ។
រីឯបរិញ្ញាបត្រជាន់ខ្ពស់ មានជំនាញហិរញ្ញវត្ថុ និងធនាគារ ជំនាញហិរញ្ញវត្ថុ និងជំនាញគ្រប់គ្រង។
តាមរយៈបទពិសោធន៍ជាង ៣០ឆ្នាំ នៅក្នុងវិស័យធនាគារ និងហិរញ្ញវត្ថុ ជាមួយនឹងបទពិសោធន៍នៃការធ្វើធុរកិច្ច ប្រកបដោយគុណភាពឈានមុខ ក្នុងយុគសម័យឌីជីថល របស់ធនាគារ អេស៊ីលីដា នឹងត្រូវចែករំលែកទៅក្នុងថ្នាលបណ្តុះបណ្តាលសម្រាប់សិស្ស-និស្សិត ធុរកិច្ចជន ឱ្យទទួលបាននូវចំណេះដឹង ជំនាញ និងបណ្តាញទំនាក់ទំនងអាជីវកម្មសមស្របតាមតម្រូវការទីផ្សារការងារ និងធុរកិច្ច ដើម្បីលើកកម្ពស់ទស្សនវិស័យ អាជីពការងាររបស់សិស្ស-និស្សិត និងមានសក្ដានុពលការងារខ្ពស់បន្ទាប់ពីបញ្ចប់ការសិក្សា ព្រមទាំងភាពជាសហគ្រិនរបស់លោកអ្នក។
ថ្លែងនៅក្នុងពិធីបើកបវេសនកាលឆ្នាំថ្មី កាលពីថ្ងៃទី១៩ កុម្ភៈ ២០២៤ លោកស្រី ប៊ុនតៃ សុវណ្ណនី ប្រធានការិយាល័យសិក្សា និងកិច្ចការនិស្សិតនៃសាកលវិទ្យាល័យពាណិជ្ជសាស្ត្រអេស៊ីលីបានមានប្រសាសន៍ថា ក្នុងរយៈពេល៨ឆ្នាំកន្លងទៅនេះ សាកលវិទ្យាល័យពាណិជ្ជសាស្ត្រអេស៊ីលីដា ទទួលបាននិស្សិតចុះឈ្មោះចូលសិក្សាចំនួន៨ជំនាន់ ដែលមាននិស្សិតសរុបចំនួន ៧ ៥១៨នាក់ គិតត្រឹមថ្ងៃទី១៦ ខែកុម្ភៈ ឆ្នាំ ២០២៤ ។
លោកស្រីបន្តថា បច្ចុប្បន្ននេះ និស្សិតកំពុងបន្តសិក្សាថ្នាក់បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់សរុប ៤ ៧៩៥នាក់ ដោយក្នុងមួយថ្ងៃមាននិស្សិតជាមធ្យមចំនួន២៥នាក់ ។ ដោយឡែកសម្រាប់និស្សិតចុះឈ្មោះចូលរៀនក្នុងឆ្នាំថ្មី ២០២៣-២០២៤ មានចំនួន ២ ៣០៣នាក់ ដែលមាននិស្សិតស្រី ១ ៧៤៥នាក់ ។
បើតាមលោកបណ្ឌិត ផុន ណារិន សាកលវិទ្យាធិការនៃសាកលវិទ្យាល័យ ពាណិជ្ជសាស្ត្រអេស៊ីលីដា បានមានប្រសាសន៍ថា ឆ្លើយតបនឹងការជឿទុកចិត្តពីសំណាក់រាជរដ្ឋាភិបាលដែលបានដំឡើងគ្រឹះស្ថានឧត្តមសិក្សាពីវិទ្យាស្ថានទៅជាសាកលវិទ្យាល័យពាណិជ្ជសាស្ត្រអេស៊ីលីដា បានធ្វើការអភិវឌ្ឍកម្មវិធីសិក្សាឱ្យទាន់សម័យជានិច្ច ជាពិសេសកម្មវិធីសិក្សាបែបឌីជីថលតាមបែបច្ចេកវិទ្យា និងវិទ្យាសាស្ត្រដើម្បីគាំទ្រគោលនយោបាយសង្គមនិងសេដ្ឋកិច្ចឌីជីថល ដោយនឹងចូលរួមចំណែកអភិវឌ្ឍន៍សង្គមឌីជីថល ដើម្បីធនធានមនុស្សនៅកម្ពុជា ទៅធ្វើការនៅក្រៅប្រទេសក្នុងឋានៈជាអ្នកជំនាញការដោយមិនមែនត្រឹមតែជាកម្មករនោះទេ ។
លោកបណ្ឌិតបន្តថា ការអភិវឌ្ឍធនធានមនុស្សមិនមែនត្រឹមតែអភិវឌ្ឍន៍យកគុណភាព ឬយកចំនួនឱ្យច្រើននោះទេ គឺត្រូវដើរទន្ទឹមគ្នាទាំងចំនួន និងគុណភាព ហើយកាលណាមានចំនួនកាន់តែច្រើននឹងអាចចូលរួមក្នុងការអភិវឌ្ឍជាមួយរដ្ឋាភិបាលនៅក្នុងវិស័យសេដ្ឋកិច្ចរបស់ជាតិបាន ។
លោកបន្ថែមថា ការទទួលស្គាល់ជាសាកលវិទ្យាពីសំណាក់រាជរដ្ឋាភិបាលកម្ពុជា ជាពិសេសពីសំណាក់សម្ដេចធិបតី ហ៊ុន ម៉ាណែត នឹងផ្ដល់ឱកាសឱ្យសាកលវិទ្យាល័យពាណិជ្ជសាស្ត្រអាចជួយរដ្ឋាភិបាលក្នុងការសម្រេចបាននូវចក្ខុវិស័យនៅឆ្នាំ២០២៣ និងឆ្នាំ២០៥០ ខណៈដែលបច្ចុប្បន្ននេះ សាកលវិទ្យាល័យពាណិជ្ជសាស្ត្រអេស៊ីលីដា បានអភិវឌ្ឍន៍ធនធានមនុស្សនៅមិនទាន់គ្រប់ទៅតាមតម្រូវការទីផ្សារការងារខាងក្រៅនោះទេ ពោលគឺ នៅតាមគ្រឹះស្ថាននានាតែងតែស្នើសុំនិស្សិតដែលជិតបញ្ចប់ការសិក្សាពីសាកលវិទ្យាល័យ ដើម្បីចូលរួមក្នុងកម្មវិធីសិក្ខាសាលាការងារ និងបំពេញការងារនៅក្នុងគ្រឹះស្ថានរបស់ពួកគេ តែជាក់ស្ដែងសាកលវិទ្យាល័យពាណិជ្ជសាស្ត្រអេស៊ីលីដា មិនមាននិស្សិតគ្រប់ចំនួនទៅតាមការស្នើសុំនោះទេ ៕
